Tabiyat in dinon begana-e-gham hoti jaati hai,
Mere hisse ki goya har khushi kam hoti jaati hai.

Wohi hai shahid-o-saaqi, magar dil bujhtaa jaata hai,
Wohi hai shammaa lekin roshani kam hoti jaati hai.

Qayamat kya ye aye husne do aalam hoti jaati hai,
Ke mahafil to wahi hai, dilkashi kam hoti jaati hai.

Wohi maikhana-o-sahabaa, wohi saagar wohi sheesha,
Magar aavaz-e-noshaano se maddham hoti jaati hai.

Wohi hai zindagi lekin 'Jigar' ye haal hai apanaa,
Ke jaise zindagi se zindagi kam hoti jaati hai.